كتبت ريما الرحباني تعليقًا مطولاً فضحت فيه أبناء عمها منصور الرحباني دون أن تدكرهم وقالت:
(عقدة عمرُن عاصي وفيروز وقام طلعلن زياد فيما بعد! خِدوا بقى تعوا قيمونا وزياد باردون يعني، أثبت حالو ومن زمان ك زياد مش ك رحباني! اي بتفرق! كتييير بتفرق!
طيب شو ذنبنا نحنا اذا الله حط نعمو بهالبيت؟ قليلة؟
يشكروا ربُّن انو الله مع نعمو عطا لأهل هالبيت النُبل والترفُّع عن كل شي والصَبر والصَمت وطولة البال.
ما تآخذوني لو ما فيروز ما حدا بيِلكِشُن لا هنّي ولا اي حدا تاني من هالعيلة المَجيدة.. إنّو بيسافروا لبرّا شو بيقولوا؟ كيف بيِلِفتوا النظر صوبُن تحدا يِسمَعلن او يِعتِرف فيهن ك بني آدمين؟ شو بيقولوا مثلاً؟ نحنا عباقرة وعالميين ونوابغ؟ وبيسفقولن ٢ بيتهوفن ٣ موزار ١ فاغنر و٧ نوتردام؟ بياخدوهن ع المصح العقلي برّا اذا سمعوا هيك شي والله هالحركات ما بتمشي معُن
والا بيقولولن نحنا ورثة نِصْ الأخوين؟ برضو ما حدا بيعبّرُن
انما بس يلفظوا إسما السلام لإسما هه! بيبلشوا يتطّلعوا فيهن
كيف اذا فالتين يحكوا ويفشّطوا ويشيخوا إنو نحنا صنعنا فيروز ونحنا شِلنا ونِحنا عمِلنا؟ ونحنا ونحنا.. اذا هون بلبنان وبوقاحة تامّة بيألفوا وبيحكوا شي من صِنف
اللجنة ما كان بدّا فيروز ابدا لو ما الاخوين ترجّوهن قال ما كانوا قِبلوا فيها
وبتِقطع هيك عادي وما حدا بيعلّق شي لبل يمكن بيصدّقوهن
باردون!؟ باردون!!؟ اللجنة حاطّة شرط ما بدّا فيروز ولا بأي شكل؟
ولك شو عم يجرّبوا يعملوا؟ لاء والأحلى ما حدا بيقلّو شي بيعيطولو إستاذ قال! ع اساس هوي المرجع قال! استاذ مين؟ هيدا يؤتمن ع إرث؟ هيدا لا يؤتمن ع جملة بدّو يؤتمن ع إرث؟ مين مفكّر حالو؟ ليش كان فقّس ايّام بعلبك؟ تيخبّرنا شو صار؟ ما في أوقح من هيك وألعى من هيك
تفو تفي تفا ماجور عن جد اللي استحوا ماتوا!
واللذة انو هني بينُن وبين حالن بيعرفوا تماماً انّو لو ما منها كانوا ولا شي ولا اي شي! بس عم يستغبونا ويستغبوا العالم والا كيف؟
بدّن يغيّروا هالواقع غَصب عن الطبيعة! بالحكي والتنظير والتحريف والتزوير!
ايش ده؟ كيف بينحكى مع هيك شي من وين منبلّش؟ قدّيه مننطر؟ نطرنا تلاتين سنة واربعين سنة لا شتي ولا غيم
بعدين سؤال برئ
ليه ما زال هلقد بيحبّوا التوزيع ومركّزين عليه، ما بيوزّعوا وبيدقّوا وبينطّوا على موسيقى بيُّن؟ عمّي منصور اشتغل ٢٣ سنة بإسمو الفردي، إلو مش إلو مش مهم، المهم إنّن بإسمو! يركّزوا على شغل بيُّن ويحلّوا كلّيا عن شغل فيروز والاخوين! الو أعمال كتيرة يعيدوها ليشبعوا ليه عينُن بس بإرث فيروز والأخوين؟
ايه؟ ليه؟ ليه؟ ليه؟
ما زال قال اذا اذا اذا فكّروا يكرّموا نصري تنقول شي مرّة بالغلط يعني،
بيجيبولك فرسان مالطا يغنّولوا إش ده؟ هيدا إسمو تكريم؟ والا تعربش وتزوير وتدعيس؟ وين التكريم لنصري بمالطا؟ كيف؟ هيدا إلغاء شرعي!
وقيسوا وامشوا..
هيدا الارث ما رح يبقى ويستمر إلا بصوت فيروز ونصري وهدى وفيلمون وملحم وايلي شويري وجوزيف صقر ومروان محفوظ وجورجيت صايغ وسهام شماس ..
شاء من شاء وابى من ابى!
وقيمتو الحقيقية بهالاصوات وبهالشخصيّات
واللي ألفوه بيعرفوا هالشي تماماً فَ مش نحنا اللي بدنا نغيّرو هلق لمصالحنا الشخصية وعقدنا النفسيّة وحقدنا وجشعنا! نحنا واجبنا وع رقبتنا نحافظ عليه وعلى هالحقيقة!
واللي مُصِر يغيّر هالحقيقة ليِدحش نفسو ويتسلّل على هالإرث، رح يبقى دخيل ويِلِفظو هالإرث وأحسنلو يغيّر مهنة اذا ما قادر يستَمِر بلا ما يشوّه ويِفتُك بهالإرث!
واضحة؟
العالم كلّو ماشي هيك وهيدا الصَح وهيدا الطبيعي
فلان بيسمع ام كلثوم. نقطة. ما حدا بيهمّو لا مين لحّنلا ولا مين وزّعلا.
العالم بتروح تحضر فيلم لروبرت دي نيرو. ما بيهمّن مين كتب السيناريو ومين أخرج الفيلم بيهمّن دي نييييييروووووو……
هاي حال الدني شو بدّنا نعمل اللي عندو مشكل مع هالشي عقدتو النفسيّة كبيرة كتير بتكون، لازم قبل ما يغيّر مهنة يزور طبيب نفساني.
اللي بيسمعوا فيروز بيسمعوا فيروز. نقطة.
واللي بيحبّوا فيروز بيحبّوا فيروز. نقطة تانية.
وهون فينا نروح ع السطر.
فيروز هيّي الأساس! طبيعي منّي عم إخترع البارود او شي جديد!
فيروز هيي الشخصيّة اللي إنرسمت عبرا وعَبر صوتا هالأعمال.
فيروز هيّي الصوت اللي وصّل واللي حِمل ونشر هالأعمال بالعالم كلّو
ولو ما منها بقيوا هالأعمال، رغم عظمِتن وفرادِتن، بإنطلياس العتيقة وكل شي حولا فجور!
ما حدا مضطر يعرف مين ألّف ومين لحّن! اكيد في ناس بيهمّن بس معظم الناس ما بيهمّن! وطبيعي جداً! بعمري ما شفت مُخرج أو سيناريست عم يفحّش بشتّى وسايل الإعلام إنّو انا صَنَعت ميريل ستريب مثلاً إنّو طبيعي كل واحد بيعمل شغلو وبس!
ولما يكون في ظاهرة الكل إتّفق عليها إسما فيروووووووووووووز والأخوين رحباني
ونحنا كورثة لازم نحافظ عليها ونعرّف الأجيال اللي جايي عليها،
ما بيكون عَبر تحريف الظاهرة ولا عَبر تفكيكها ولا عَبر تشويها ولا عَبر تزويرا ولا عَبر التعِربش عليها ولا عَبر طَمس حامليها اللي هنّي الاصوات اللي وصّلتها واللي جعلت منها ظاهرة.
كيف ناس مش فاهمة هالظاهرة ممكن تحافظ عليها؟
اذا شلنا صوت فيروز من هالظاهرة شو بيبقى؟
شو بيبقى من الرواية؟ غير قصص زغيرة عم تشرّدها الريح
قد يتبع!
